அப்பாவுக்குத் தெரியாதா? #2

இதற்கு முன்பு எழுதிய அப்பாவுக்குத் தெரியாதா #1 பதிவு படிக்கவில்லையா? அதையும் படித்துவிட்டு இங்கே வந்தால், இன்னும் சிறப்பாக ரசிக்கலாம் :P "ரசிக்கலாம் என்று நினைக்கிறேன்"

அப்பா!

ஆக மொத்தம் என்னை என் அப்பா தனியாக சைக்கிளில் பள்ளிக்கு இனி அனுப்பவேமாட்டார்கள் என்று தான் நினைத்திருந்தேன். எப்போதும் அப்பாவோடு தான் செல்ல வேண்டும், மற்ற பிள்ளைகள் எல்லாம் அவர்களாகவே சைக்கிளில் வர, நான் மட்டும் அப்பாவோடு மட்டும் தான் செல்ல வேண்டும்.

இப்படி நினைத்துக் கொண்டு இருந்தேன். பத்தாம் வகுப்பு. ஒரு நாள் ஆசையாக இருக்கவே, "அப்பா, நான் ஸ்கூலுக்கு சைக்கிள்ல போறேன்பா..." இப்படி மெதுவாய் பூனை போல அப்பாவிடம் கேட்டேன். எப்படியும் அப்பா வேண்டாம் என்று தான் சொல்வார் என்பது முன்பே தெரிந்த கதை. இருந்தாலும் ஆசைக்கு ஒரு முறை கேட்டேன்.

அதே போல, அப்பா வேண்டாம் என்று சொல்லிவிட்டார்! :(

அட, இறுதி வரை நாம் இப்படித் தான் அப்பா பின்னே மட்டும் செல்வோம் போல என்று நினைத்து இரண்டு நாட்கள் சோகமாகவே இருந்தேன்.

அம்மா, "என்ன உம்முனு இருக்க?", இப்படிக் கேட்க, "ஒன்னும் இல்ல" என்று சொல்ல, அம்மா தான் சொன்னார் அந்த மகிழ்ச்சியான செய்தியை, ஆம், நான் சைக்கிளில் போகலாம் இனி பள்ளிக்கு! :) :) :)

எனக்கு ஒரே ஆனந்தம், "போலாமா?", என்றேன் அம்மாவிடம், "ஆமா, போலாம்", என்றார் அம்மா.

"நீங்க சொல்விங்க, அப்பா வேணாம்னு சொல்லிடுவாங்க", என்று மறுபடி சோகமாக முகம் எனக்கு மாறவே, அம்மா சொன்னார், "அப்பா தான் சொன்னங்க, நீ சைக்கிள்ல போலாம்னு"

எனக்கு அத்தனை ஆனந்தம், ஓடிப் போய் எனது சைக்கிளை நன்றாகத் துடைத்தேன், வெறும் துணியால் ஒரு முறை, தண்ணீர் வைத்து ஒரு முறை, என்று தொடைத்து, எண்ணெய் எல்லாம் போட்டு, ஒரே அமர்க்களமாக தயார் செய்தேன்.

ஆனால், இன்று வரை எனக்கு ஒன்று மட்டும் புரிவதே இல்லை, என்ன நல்ல விஷயம், எனக்கு ஆனந்தம் தரும் விஷயம் என்றாலும், என் அப்பா என் அம்மாவிடம் சொல்லி தான் என்னிடம் சொல்லச் சொல்வார், அது ஏன்? அது ஏனென்று உங்களுக்குத் தெரிந்தால் சொல்லுங்கள் எனக்கும்?

பிறகு கல்லூரிக்குச் செல்கிறேன் வண்டியில் என்று கேட்டேன் முதலாம் ஆண்டு படிக்கும் போது, அப்பா விடவில்லை.

ஆனால் இப்போது, அப்பாவே சொல்கிறார், பார்த்து மெதுவாகப் போய்
 வரவேண்டும் என்று.

பத்தாம் வகுப்பில் சைக்கிளில் தொடங்கினேன், இப்போது கார் ஓட்டப் பழகப் போகிறேன் :)

இதுவரை என்னை தனியே வெளியே அனுப்ப அப்பா கொஞ்சம், கொஞ்சம் இல்லை நிறையவே தயங்குவார். ஆனால், இப்போதோ? நானே துணைக்கு அழைத்தாலும், "போயிட்டு வா பாத்து", இப்படிச் சொல்கிறார்!

அப்பாவுக்குத் தெரிகிறதே, எனக்கு எது எப்போது வரும், வேண்டும் என்று.

பிறகு இன்னொன்று, "அவங்க ரொம்ப நல்ல அப்பா, ஏமாத்தமாட்டாங்க" :)

உங்க அப்பா எப்படி?